მოვამზადოთ ცომი: წყალში ჩავყაროთ მარილი, შაქარი, თანდათან დავამატოთ ფქვილი და მოვზილოთ, დავამატოთ მზესუმზირის ზეთი და ისევ ვზილოთ. მზა ცომს გადავაფაროთ პოლიეთილენის პაკეტი და დავდგათ თბილ ადგილას 30 წუთის განმავლობაში. 
გულსართი: გავტეხოთ კვერცხი, დავაცალკაოთ გული და ცილა ერთმანეთისგან. ყველი გავხეხოთ, შევურიოთ ცილა და კარგად ავურიოთ. როდესაც ცომი ამოვა, დაახლოებით 200 გრ. მოვაჭრათ. გავაბრტყელოთ 0,5 სმ. სისქეზე და მივცეთ ოვალური ფორმა.
ტაფაზე მოვაყაროთ ფქვილი, დავდოთ ცომი და შუაგულში მოვათავსოთ ყველი. გვერდებიდან ცომი ამოვახვიოთ ისე, რომ ნავის ფორმა მიიღოს. ისევ დავაყაროთ ცოტა ყველი. ნავის ნაპირებს წავუსვათ კვერცხის გული და შევდგათ გამოსაცხობად წინასწარ 250 გრადუს ტემპერატურაზე გახურებულ ღუმელში. როცა ცომი შეწითლდება, გამოვიღოთ ღუმელიდან, ავიღოთ მთლიანი კვერცხი და მისი საშუალებით ჩავაღრმავოთ ცომის შუაგული, შემდეგ კვერცხი გავტეხოთ და ჩავასხათ ჩაღრმავებულ ადგილას და ისევ შევდგათ ღუმელში 2 წუთით. შემდეგ გამოვიღოთ ხაჭაპური და შუაგულში ჩავუდოთ კარაქის ნაჭერი. აჭარული ხაჭაპური მზად არის.