Bayram oshi – Toshkentcha bayram palovi

Bayram oshi – shunchaki palov emas. Bu – asrlar davomida odamlarni bir dasturxon atrofida jamlab kelgan udumdir. U to‘y-ma’rakalarda, farzand tavalludida, katta bayramlarda tayyorlanadi – har bir holatda ham u mo‘l-ko‘lchilik, hurmat va hamjihatlik ramzi sanaladi. Sarxil qo‘y go‘shti, sariq sabzi, no‘xat, mayiz va “lazer” navli guruch – barcha masalliqlar qozonda bir-biriga singib, yaxlit holga kelguncha dimlanadi. Suzishda qatlamlarga ajratilmaydi – har bir qoshiqda hamma narsa baravar bo‘lishi kerak. Mana shu – Bayram oshidir.

Tayyorgarlik vaqti

60+ daqiqa

Qiyinchilik

Qiyin

kkal

500+

Taom turi

Asosiy taom

Mos tushadi

Borjomi mineral suvi

Retsept muallifi

Sardor Raimov

Ingredientlar

Qo‘y go‘shti

1700 gr

Guruch

1000 gr

Sariq sabzi (somoncha shaklida to‘g‘ralgan)

1600 gr

Yog‘ (paxta yoki o‘simlik yog‘i)

300 ml

250 gr

Piyoz

200 gr

No‘xat (oldindan ivitilgan)

100 gr

Mayiz

100 gr

Zira

10 gr

Zarchava

2 gr

Tuz

ta'bga ko'ra

Qadam

Qizib turgan qozonga paxta yog‘i solib, dumba yog‘ini tashlang. Dumbani asta-sekin tilla rang, xushbo‘y yog‘ hosil bo‘lguncha eritib, jizzasini suzib oling. Parallel ravishda guruchni yaxshilab yuvib, kamida 1 soat iliq suvga ivitib qo‘ying – bu oshdagi guruchning sochiluvchan boʻlishini ta’minlaydi.

Qadam

Zirvak
Qizib turgan yog‘ga qo‘y go‘shtini solib, qizargunicha qovuring. So‘ngra piyozni qo‘shib, tillarang tusga kirgunicha qovuring va tuz seping. Keyin sariq sabzini solib, darhol ustidan qaynoq suv quying. O‘rtasiga ivitilgan no‘xatni solib, zira va zarchava seping. Ustini zanglamaydigan idish bilan yopib, past olovda 1,5 soat dimlang.

Qadam

Guruchni solish
Mayizni qo‘shib, yuzasini tekislang. Ustiga ivitilgan guruchni aralashtirmasdan bir tekis qilib soling. 15 daqiqa davomida bug‘latib, so‘ng tuz seping va qatlamlarni ehtiyotkorlik bilan ag‘daring. Har 15 daqiqada ohista aralashtirib turing. So‘ngida guruchni kapkir bilan bosib, o‘rtaga gumbaz qilib to‘plang, qopqog‘ini yopib, past olovda yana 20 daqiqa dimlab qo‘ying.

Qozonni olovdan olib, qopqog‘i yopiq holda bir necha daqiqa damlantiring. Guruch, go‘sht, sabzi, no‘xat va mayiz bir tekis aralashishi uchun yaxshilab aralashtiring. Bayram oshida qatlamlar bo‘lmaydi: har bir porsiyada hammasidan bo‘lishi kerak.

Taom bezagi

Tayyor bo‘lishi bilan issiqligida dasturxonga torting. Yoniga achchiq-chuchuk yoki qatiqli bahoriy salat qo‘yish mumkin. Ta’bga ko‘ra bedana tuxumi yoki qazi bilan to‘ldirsa ham bo‘ladi.

Izohlar