Sardor Raimov

 Sardor Raimov harbiy bo‘lishni orzu qilgan. O‘qishga ham kirgan, biroq bu sohada ishlari yurishmagan. Onasining tavsiyasi bilan oshpazlikka o‘qishga borgan. Shu tariqa 16-17 yoshida Caravan Group’ga ishga kirib, u yerda naq 19 yil faoliyat yuritgan.

Turizm kollejida Yevropa taomlari oshpazligi yo‘nalishida tahsil olgan, ammo hayot o‘z yo‘liga boshlagan: ishini xamirli taomlar sexidan boshlagan, birinchi tayyorlagan taomi esa manti bo‘lgan. Vaqt o‘tishi bilan taom tayyorlashning barcha yo‘nalishlarini o‘zlashtirgan, Rossiya, Qozog‘iston, Germaniya va Dubayga qisqa muddatli malaka oshirishga, jumladan, bosh oshpaz bilan ko‘rgazmalarga ham borgan. Biroq asosiy ish joyi hamisha bitta mamlakat – O‘zbekiston bo‘lgan.

Amaliyotni InterContinental va O‘zbekiston mehmonxonalarida o‘tagan. Bugun 35 yoshda bo‘lgan bu insonning bir kompaniyadagi yigirma yillik tajribasi va o‘zgarmas bir e’tiqodi bor: iste’dod muhim, biroq mashaqqatli mehnat va o‘z ishiga mehr bo‘lmasa, hech qanday retsept ish bermaydi. Sardorning o‘zi aytganidek, onaning ovqati har doim restorannikidan mazaliroq. Chunki ona uni chin yurakdan pishiradi.