ზურა სადუნიშვილი, 29 წლის, რესტორანი ჯორჯოს შეფ-მზარეული.
ბაბუაჩემიც მზარეული იყო, მთელი ოჯახი კულინარობდა და ინსპირაციის მთავარი წყაროც ეს იყო. დავამთავრე აგრარული უნივერსიტეტი და კულინარიული ანაბანაც იქიდან ვისწავლე.  

უფრო სერიოზულ დონეზე ავიყვანე ის ცოდნა, რაც ოჯახიდან მომყვებოდა, მაგრამ ყველაზე ნამდვილი გამოცდილება, რა თქმა უნდა, პრაქტიკით მოვიდა. ეს საქმე არ მეგონა ისეთი რთული, როგორიც აღმოჩნდა, მაგრამ თუ შენი საქმე გიყვარს ამ სირთულეებს გადალახავ და მიაღწევ იმას, რაც გინდა.

რომ არა შეფი, ალბათ მასწავლებელი ვიქნებოდი, რადგან ძალიან მიყვარს სწავლება, ამიტომ ჩემს პროფესიაშიც შემოვიყვანე ეს ნაწილი და სიამოვნებით  ვუზიარებ ჩემს გამოცდილებას დამწყებ მზარეულებს. მიყვარს კულინარიული სიახლეები, თუმცა ვთვლი, რომ კლასიკის შეცვლას სრულიად ახალი კერძებს შექმნა მირჩევნია. 

მთავარია, თითოეული კერძი მოამზადო კარგ ხასიათზე და რაც არ უნდა, ხდებოდეს მთელი გული ჩადო. მოამზადო ისე, თითქოს შენი უკანასკნელი კერძია.