Yergeshaliyev Sanjarbek

Mening ismim Sanjarbek Yergeshaliyev va men The Bridge restoranining bosh oshpaziman. Kasbiy faoliyatim 2008-yili Yekaterinburg shahrida boshlangan va aynan o‘sha yerda restoran sohasiga ilk qadamlarimni ofitsiant sifatida qo‘yganman. Har kuni oshxonadagi sehrli jarayonni kuzatib, ushbu pazandachilik olamining bir qismiga aylanishni orzu qilardim.

Vaqt o‘tib, maqsadim yo‘lidagi intilishlarim o‘z samarasini berdi: men oshpaz yordamchisiga aylandim va Yevropa taomlari asoslari hamda oshxonaning qat’iy tartib-intizomini o‘rgandim. Uch oylik mashaqqatli mehnatdan so‘ng rasman oshpaz bo‘ldim. Ilk jiddiy tajriba va a’lo darajadagi kasbiy poydevorga esa FlyingFish (“Uchar baliq”) loyihasida ega bo‘ldim.

Keyinroq Avocado restoranida bosh oshpaz sifatida ish boshladim. Bu maskan men uchun haqiqiy ijod maydoniga aylandi va unda o‘zim uchun yangi ta’mlarni, zamonaviy uslublarni hamda gastronomiyaga mualliflik yondashuvlarini kashf etdim.

2015-yili hayotimdagi muhim qarorlardan birini qabul qildim va Aktau shahriga ko‘chib o‘tdim, u yerdagi “Шахта” restoranida bosh oshpaz bo‘lib ishladim. Ammo faoliyatimdagi va ijodiy yo‘limdagi chinakam yuksalish 2017-yili The Bridge jamoasiga qo‘shilganimda yuz berdi.

Aynan shu yerda men o‘z qarashlarimni ro‘yobga chiqara oldim hamda mehmonlar benuqson Yevropa klassikasidan tortib, yorqin mahalliy koloritga ega milliy taomlargacha topa oladigan xilma-xil oshxonani yaratdim. Men uchun shunchaki ovqat pishirish emas, balki har bir yangi ta’m orqali insonlarga hissiyotlar hadya etish muhimdir.