Ruslan Abdullayev

Mening ismim Ruslan Abdullayev, men Astona shahridagi SHATÉ restoranining brend-shefiman. Gastronomiyadagi yo‘lim 20 yil avval ona shahrim Qizilo‘rda oshxonalaridan boshlanib, poytaxtning mashhur loyihalarida davom etdi. Shu vaqt mobaynida men jamoa bilan ishlash bo'yicha o‘z tizimimni yo‘lga qo‘ydim va mahsulotning mukammal sifatiga qanday erishishni anglab yetdim.

Davlatning birinchi shaxslari ishtirokidagi tadbirlarda 10 yildan ortiq ishlaganim men uchun ajoyib professional maktab bo‘ldi. Bu mutlaq intizom, aniq harakat va to‘la-to'kis ishonchni talab qiladigan darajadir. Bundan tashqari, jahon miqyosidagi oshpazlar, jumladan, Michelin yulduzlari sohiblari — Mauro Kolagreko va Mishel Lens bilan hamkorlik mening dunyoqarashimga kuchli ta’sir ko‘rsatdi. Ular sharofati bilan men mahsulotga yondashuv va taomni dasturxonga tortish estetikasining eng ilg‘or usullarini o‘zlashtirdim.

Mening professional poydevorim — yevropacha taomlari oshxonasi bo‘lib, uni uzoq vaqt mahalliy urg‘ular bilan boyitib keldim. Ammo aynan SHATÉda o‘z o‘rnimni topdim va ta’mga xos yuksak didni qanday rivojlantirishni istayotganimni aniq tushundim. Bugun asosiy diqqat-e’tiborim zamonaviy qozoq oshxonasiga qaratilgan. Ishonchim komil: milliy gastronomiyamizni butunlay o‘zgartirish shart emas. Uni tarixga hurmat ko‘rsatib, asl ta’mini saqlagan holda, zamonaviy ohang baxsh etish orqali ochib berish muhimdir.

Mening asosiy tamoyilim — murakkablashtirmaslik. Men mehmonlarga yana va yana qaytib kelishga undaydigan mazali va tushunarli taomlar tortishni istayman. Barchasining zamirida puxta texnikalar, muvozanat va murosasiz sifat yotadi. Likopchadagi har bir masalliq tasodif emas, balki taomning tuzilishi, ifori va umumiy uyg‘unligini ta’minlaydigan o‘ylangan elemantdir.

Aynan shu falsafa SHATÉ oshxonasini belgilab beradi. Bu yerda qozoq gastronomiyasi mamlakat ahli uchun ham, xalqaro mehmonlar uchun ham tushunarli bo‘lgan zamonaviy tilda so‘zlaydi. Har bir taom — shunchaki retseptdan iborat emas. Bu — mening mualliflik nigohim orqali ifodalangan tarix, hissiyot va merosga ehtiromdir.