Sershira kotlet siri: go‘sht tindirilishining sababi

Bosh oshpaz Boburning asosiy qoidasi – shoshmaslik. Ayniqsa, gap kotletlar haqida ketayotganda.

“Gorinich” kotletining vazni 400 gramm, shuning uchun ham uni shunchaki tovaga tashlab, pishishini kutib bo‘lmaydi. Agar tinimsiz qovurilsa, sirti chiroyli rangga kiradi-yu, ichi xomligicha qoladi. 
(carousel)
Bobur bosqichma-bosqich ishlashni maslahat beradi: sirtini qizartirish uchun baland olov – 10 daqiqa tindirish – 5 daqiqa duxovkada pishirish – yana 5 daqiqa tindirish. Bu jarayon uch marta takrorlanadi. Shundagina issiqlik kotletning ichigacha bir tekis yetib boradi.

Ikkinchi tamoyil – mahsulotga hurmat. Agar mol go‘shti sifatli bo‘lsa, unga ortiqcha ziravorlar shart emas. Tuz va murchning o‘zi kifoya. Go‘shtni bozordan xarid qilgan ma’qul – u yerda tanlov ham ko‘p, sifati ham ko‘z o‘ngingizda namoyon bo‘ladi. Bosh oshpazning so‘zlariga ko‘ra, bu har qanday taom muvaffaqiyatining 50 foizini tashkil etadi.

So‘nggi maslahat: xato qilishdan qo‘rqmang. O‘nta urinishdan to‘qqiztasi omadsiz yakunlanishi mumkin, ammo o‘ninchisi aynan siz kutgan natijani beradi. Pazandalik tajribasi faqat amaliyot, diqqat-e’tibor va o‘zingizga nisbatan rostgoʻylik orqaligina orttiriladi.