“კულინარია ჩემთვის ბავშვობიდან პოზიტივის და ყველანაირი დადებითი ენერგიის მომტანი იყო. მოვდივარ უაღრესად ტრადიციული, ქართული სამზარეულოს მოყვარული ოჯახიდან. პატარაობიდანვე ვცდილობდი ჩემი ნაწილი ჩამექსოვა ტრადიციულში, მურაბების არატრადიციული გზით მომზადებაც სწორედ ბავშვობის ამ სურვილის გამოძახილი იყო და აქედან დაიწყო “არომატი”-ს შექმნის თავგადასავალი.

არ დამიმთავრებია არც ერთი კულინარიული სკოლა, არასდროს გამივლია კურსები. მიუხედავად იმისა, რომ ბევრი ალბათ ამას უყურებს როგორც ბარიერს, ჩემი სამზარეულო ამ ყველაფერმა ულიმიტო გახადა. თავისუფალი ვარ ყველა იარლიყისგან და ყოველთვის მაქსიმალურ გასაქანს ვაძლევ ჩემს ფანტაზიას.

22 წელია ვეგეტარიანელი ვარ, მაგრამ არც ეს არის წინაღობა, ჩემთვის ეს ცხოვრების წესი, ვარჯიშთან ერთად ენერგიის წყაროა და იმდენად ბუნებრივი, რომ სხვაგვარად აღარც წარმომიდგენია ჩემი რუტინა. ვფიქრობ, ჯანსაღი ცხოვრების პოპულარიზაცია ერთ-ერთი ყველაზე მნიშვნელოვანი საკითხია დღეს და ზუსტად ეს არის ჩემი მიზანი.” - ნინო თვალავაძე