როლატინი ქართულად

“დავიბადე ზუგდიდში, ძალიან დატვირთული და საინტერესო ბავშვობა მქონდა. სკოლის გარდა დავდიოდი ხატვაზეც, ცეკვაზეც, მუსიკაზეც. და-ძმა მე არ მყავდა, ამიტომ სახლში ან ვმეცადინეობდი, ან ვკითხულობდი წიგნებს. განსაკუთრებით მიყვარდა ზაფხულობით ზღვაზე რომ მივდიოდით აფხაზეთში, ან ანსამბლთან ერთად სადმე ტურში, ან ფესტივალებზე. გამორჩეულად კარგი სამეზობლო გვყავდა, დავრბოდით ბავშვები, თითქოს საკუთარ სახლში, ვიცოდით ვისთან რა საჭმელი მზადდებოდა. ახლა რომ ვიხსენებ, ყველა კარგი მზარეული იყო, განსაკუთრებით ქორწილები იყო საინტერესო, ყველა მეზობელს ჰქონდა თავისი “ნიშა” და საქმე :) დედაჩემი, მაგალითად, აცხობდა შუს და ნაპოლეონს, ნიგვზიან კერძებს ამზადებდა. სხვანაირი სიყვარული, გვერდში დგომა, ფასეულობები იყო. 
დავამთავრე თსუ-ს ფილოლოგიური ფაკულტეტი, რუსული ენა და ლიტერატურა, თუმცა ჩემი პროფესია მხოლოდ სასაუბროდ და მეილების წერაში თუ გამოვიყენე. საკმაოდ საინტერესო სამსახურები მქონდა, მოხალისედაც სიამოვნებით მიმუშავია. კულინარია და გემრიელი კერძები ყოველთვის მიყვარდა, ბებიაც სასწაულად ამზადებდა და დედაც. დღე არ გავიდოდა სტუმარი არ გვყოლოდა სახლში, ამიტომ სულ ფუსფუსი იყო ხოლმე. დღემდე ვამზადებ ლობიოს ბებიას რეცეპტით, საცივს დედაჩემის რეცეპტით. 
რამდენიმე წლის წინ ჩემმა მეგობარმა გააკეთა ფეისბუქ გვერდი “დღეს რა ვჭამოთ” და აი მანდ დავიწყე აქტიურობა და ფუსფუსი. ყოველდღე რაღაცას ვხრაკავდი, ვხარშავდი, ვაცხობდი, ვსწავლობდი, ვუყურებდი ვიდეოებს და ფილმებს კულინარიაზე. ჩემი სუსტი მხარეა რეცეპტების წერა, რომ მეკითხებიან, არასოდეს ვიცი გრამაჟი. ერთნაირად არ ვამზადებ, ყოველთვის ჩემებურად ვაკეთებ და სიამოვნებას მანიჭებს ეს პროცესი. პანდემიის დროც დაემთხვა ჩემს გასტრონომიულ ექსპერიმენტებს. ამ ყველაფერმა მიმიყვანა იქამდე, რომ ახლა ვმუშაობ პატარა რესტორანში, შეფ-მზარეულის დამხმარედ. ძალიან მომწონს ეს საქმე, საინტერესო და მრავალფეროვანია. სულ სხვა დინამიკა და სისწრაფეა, ძალიან ბევრს ვსწავლობ ჩემი შეფისგან და მადლობა მას ამისათვის :) სამომავლოდ ვფიქრობ ქალაქგარეთ, თბილისთან ახლოს ცხოვრებას და ჩემი პატარა საქმის წამოწყებას, ვნახოთ :)
ქართული სამზარეულო ჩემი ფავორიტია, ასევე ძალიან მიყვარს იტალიური, ფრანგული სამზარეულო და ამიტომ დღეს მოგიტანეთ უმარტივესი იტალიური კერძი. მხოლოდ რიკოტა და მოცარელას ნაცვლად გამოვიყენე ნადუღი და სულუგუნი, თქვენც სცადეთ აუცილებლად, ბადრიჯნის ნაცვლად ყაბაყიც შეგიძლიათ გამოიყენოთ. გემრიელად მიირთვით!” - ლალი ჯაბუა