ნადუღის ჩიზქეიქი მარწყვით

ნადუღი და არაჟანი დააბლენდერეთ, ვიდრე არ მიიღებთ პრიალა, ერთგვაროვან მასას. მეორე ჯამში ათქვიფეთ კვერცხი, 130 გრ. შაქარი, ოთახის ტემპერატურის კრემ-ყველი, ვანილის ექსტრაქტი, ½ ლიმონის წვენი და ½ ლიმონის ცედრა. თქვიფეთ სანამ მასა არ გახდება ფაფუკი.

ნელ-ნელა შეურიეთ ნადუღი და არაჟანი, მოურიეთ სპატულას დახმარებით. სულ ბოლოს დააცერით 1 ს.კ ფქვილი და 2 ს.კ სიმინდის სახამებელი. გადაურიეთ დელიკატურად. მასა გადაანაწილეთ ყალიბში ან ინდივიდუალურ ყალიბებში. მოათავსეთ საცხობ ფირფიტაზე, გვერდით დაუდგით წყალი ცეცხლგამძლე ჯურჭლით. აცხვეთ დიდი ყალიბის შემთხვევაში 60-70 წუთი, პატარების შემთხვევაში 25-30 წუთი. გამორთეთ და დატოვეთ დაკეტილ ღუმელში 2 საათით. შემდეგ გამოიღეთ, გააგრილეთ ბოლომდე და შეინახეთ მაცივარში 3 საათით ან მთელი ღამით.

სანამ ჩიზქეიქი ცივდება, მოვამზადოთ მარწყვის კონფი - 150 გრ მარწყვი, 50 გრ შაქარი და ½ ლიმონის წვენი მიიყვანეთ ადუღებამდე, ხარშეთ 7-10 წუთი, შესქელებამდე. დააბლენდერეთ და შეინახეთ გამოყენებამდე.

ფხვიერი ძირის მოსამზადებლად შეგიძლიათ დაფშვნათ მზა ორცხობილა ან თავად მოამზადოთ ქოქოსის ხრაშუნა ძირი. გააცხელეთ ღუმელი 190 გრადუსზე. 50 გრ შაქარი, 50 გრ ფქვილი, 50 გრ კარაქი და 40 გრ ქოქოსის ფანტელი ჩაყარეთ ჯამში, ხელით დაამუშავეთ ისე, რომ მიიღოთ ფხვიერი მასა, გადაიტანეთ საცხობ ფირფიტაზე და აცხვეთ 10 წუთი ან შეწითლებამდე.

თეფშზე მოფანტეთ ხრაშუნა ძირი, ყალიბიდან ამოიღეთ ჩიზქეიქი, დადეთ თეფშზე და მოასხით მარწყვის კონფი.